प्रविण अधिकारी
दमक । नेत्र विक्रम चन्द “विप्लव ” नेतृत्वको नेपाल कम्युनिस्ट पार्टी झापाले दार्चुलाका ३२ वर्षिय युवा जयसिंह धामीको न्याय माग्दै अमानवीय हत्याको विरूद्व विरोध प्रदर्शन गरेको छ ।
भारतीय सुरक्षा फौज (एसएसबी) ले तुइनमार्फत महाकाली नदि तर्ने क्रममा तुइनको डोरी काटिदिएपछि धामी नदिमा खसेर बेपत्ता भएका थिए ।
भारतीय एसएसबीले नेपाली युवा जयसिंह धामीको अमानवीय हत्या गरेको भन्दै नेपाल कम्युनिस्ट पार्टीले साउन १६ र १८ गते देशव्यापी विरोध प्रदर्शनको घोषणा गरेको थियोे ।
सोही अनुरूप १६ गते शनिबार पार्टीले सीमानाका काँकरभिट्टामा वृहत् विरोध प्रदर्शन गरेको थियो भने सोमाबार (आज) दमकमा प्रदर्शन गरेको हो ।
दमकको विरोध ¥यालीमा पार्टीका केन्द्रीय सदस्य एवम् झापा जिल्ला इन्चार्ज सुमन लिम्बू , पार्टी केन्द्रीय सदस्य एवम् इलाम जिल्ला इन्चार्ज सुमनसिंह पौडेल, जिल्ला सचिव प्रशान्त थापा, जिल्ला कार्यालय सचिव संजय राईलगायतका जिल्ला तहका नेता तथा कार्यकर्ताहरूको बाक्लो उपस्थिति रहेको थियोे ।
दमकको बसपार्कबाट सुरू भएको विरोध ¥याली कार्यक्रम पशुहाट, गणतन्त्र चोक, आकाशेपुल, गोर्खा डिपार्टमेन्ट हुँदै पुनः गणतन्त्र चोकमा आएर कोणसभामा परिणत भएको थियोे । ¥यालिमा विभिन्न नारासहितका प्लेकार्डहरू समेत प्रदर्शन गरिएको थियोे ।
जयसिंहलाई न्याय दे, भारतीय हस्तक्षेप बन्द गर, दलालहरू होसियार, एमसीसी सम्झौता खारेज गर, भारतीय एसएसबी मुर्दावाद, नेपालीहरूको जीवन रक्षा गर , घटनाको सत्यतथ्य छानवीन गर, वैज्ञानिक समाजवाद जिन्दावाद, एकीकृत जनक्रान्ति जिन्दावादलगायतका नारा लगाइएको थियोे ।
कोणसभालाई नेपाल कम्युनिस्ट पार्टीका जिल्ला कार्यालय सचिव संजय राईले सञ्चालन गरेका थिए भने सभालाई केन्द्रीय सदस्य एवम् जिल्ला इन्चार्ज सुमन लिम्बूले सम्बोधन गरेका थिए । कार्यक्रम सञ्चालनका क्रममा भारतीय एसएसबीले अमानवीय तरिकाले हत्या गरिएका जयसिंहलाई सहिद घोषणा गर्न माग गरिएको थियो ।
आफुहरूले देश र जनताको हितका लागि कुरा उठाउँदै गर्दा, जनताको जीवन रक्षाका निमित्त आवाज उठाउँदै गर्दा, साम्राज्यवादीहरूको विरोध गर्दैगर्दा सत्ता सञ्चालक दलालहरूले प्रतिबन्धसमेत लगाएको स्मरण गर्दै वैज्ञानिक समाजवाद प्राप्तिका निमित्त कटिबद्ध भएर लड्ने उद्घोष गरेका थिए ।
त्यस्तै कोणसभालाई सम्बोधन गर्ने क्रममा पार्टी केन्द्रीय सदस्य एवम् झापा जिल्ला इन्चार्ज सुमन लिम्बूले जयसिंह धामिको हत्याको सत्यतथ्य छानवीन गरी हत्यारा एसएसबीलाई हदैसम्मको कारबाहीको माग गर्दै नेपाल र नेपालीमाथि पटक–पटक भारतीयहरूको हस्तक्षेप हुँदासमेत भारत र अमेरिकी साम्राज्यवादका दलाल नेताहरूले चुँइक्क नबोलि बसेको आरोप लगाए । यो सत्ता र यसका सञ्चालक आफ्नो ढंगबाट नभएर विदेशी दलालहरूको इशारामा चलिरहेको बताउँदै यो संसदीय व्यवस्था पूर्ण रूपमा असफल भएको जिकिर गरे ।
भारतले आफ्नो नागरिकको हत्या गर्दासमेत सरकारले घटनाको छानवीन गर्न र सत्यतथ्य सार्वजनिक गर्न आलटाल गरेको भन्दै लिम्बूले आफ्नो नागरिकप्रति जिम्मेवारी बोध गर्न नसक्ने शेरबहादुर देउवा नेतृत्वको सरकारको राजिनामा माग गरेका छन् ।
हिजो विदेशीको इशारामा चलेको दलाल सरकारको संरक्षण गर्दै सडकमा प्रदर्शन गर्ने र केपी ओली “आइ लभ यु” भन्ने एमालेका कार्यकर्ताहरू आज आफ्नो देशको नागरिकको अमानवीय हत्या हुँदा कहाँ गए भन्दै उनले यो सत्ताको एकमात्र विकल्प वैज्ञानिक समाजवाद रहेको दाबी गरे ।
नेता लिम्बूले हिजो सुकुम्बासी जनताको भोटबाट जनप्रतिनिधि बनेकाहरू नै आज सुकुम्बासी बस्तिमा डोजर चलाउन लागिपरेको, गरिब ,मजदुरहरू माथि शोषण गरेको र दलालहरूको विरूद्व अब मजदुर सुकुम्बासीले विद्रोह गर्नुपर्ने र त्यसको नेतृत्व पार्टीले गर्ने बताए ।
-1730172087.jpg)