बिर्तामोड । डी. कौडिन्य स्मृति पत्रकारिता पुरस्कारबाट पत्रकारद्वय झुलन रेग्मी र डिकश लामा पुरस्कृत भएका छन् ।
स्व. पत्रकार देवकुमार आचार्य'डी. कौडिन्य' को स्मृतिमा हरेक वर्ष वितरण हुने स्मृति पत्रकारिता पुरस्कार यो पटक मेची खबर साप्ताहिकका झुलन रेग्मी र नेपाल टेलिभिजनका डिकेश लामालाई प्रदान गरियो ।
पुरस्कार रकम वृद्धि गर्दै यो पटक ४२ हजार पुर्याइएको आयोजकले बताएको छ । रेग्मी र लामालाई जनही २१ हजार रुपैयाँ, प्रशंसापत्रसहित सम्मान गरियो ।
सोमबार सिटी सेन्टर बिर्तामोडमा आयोजित पुरस्कार वितरण समारोहमा रेग्मी र लामालाई प्रमुख अतिथि कोशी प्रदेशका पूर्व आर्थिक मामिला तथा योजना मन्त्री इन्द्र आङ्वो 'मौसम', सहिद आचार्य पत्नी यमुना आचार्यलगायतले पुरस्कार प्रदान गरेका थिए ।
सोही अवसरमा प्रेस सेन्टर नेपाल झापाले स्व. पत्रकार डी कौडिन्यको नाममा अक्षयकोष स्थापना गर्ने घोषणा गरेको छ । अक्षयकोषमा पत्रकार सुब्रत न्यौपानेले १० हजार रुपैयाँ, राजेन्द्र गौतमले ५ हजार १ रुपैयाँ प्रदान गर्ने प्रतिवद्धता व्यक्त गरेका छन् ।
कार्यक्रममा प्रेस सेन्टर नेपालका केन्द्रीय सचिव बिमल लामिछानेले स्व. पत्रकार डी. कौडिन्यको जीवनको संक्षिप्त चर्चा गरेका थिए ।
वि. स. २०२९ सालमा जन्मिएका आचार्यको तात्कालिन बिद्रोहको समयमा २०५९ साल साउन ७ गते राज्यले गिरफ्तार गरी हत्या गरेको थियो ।
कार्यक्रममा स्व. आचार्यकी पत्नी यमुना आचार्यले देश निर्माण र राज्य सत्ता परिवर्तनका लागि आफ्नो श्रीमानले गरेको योगदानको स्मरण गरिन् । उनले राज्यले सहिद परिवारको भावना माथि कुल्चिएर हिँडेको दुखेसो गरिन् ।
प्रमुख अतिथि आङ्वोले सुरुवातमा नेपालमा भएका आन्दोलनबाट एउटा शासकबाट अर्को शासकको हातमा शासन जान बाहेक खासै उपलब्धी नभएको बताउँदै जनयुद्ध र जनआन्दोलनबाट संघीय लोकतान्त्रिक व्यवस्था स्थापित भएको दावी गरे ।
उनले संस्थागत हुने नसकेको संघीयताको बाँकी हिस्सा संविधान संशोधनमार्फत हुने बताए । आङ्वोले भ्रष्टाचारको केन्द्रको रुपमा स्थानीय सरकार भएको बताए । उनले मुख्य कानुनहरु अझै बनिनसकेको धारणा राखे ।
फरक प्रसंगमा आङ्वोले नेपालमा चर्चामा रहेको एमसीसी नेपालको हितमै भएको धारणा राख्दै आफू एमसीसीकै पक्षधर रहेको बताए । उनले हाम्रो जस्तो देशले बृहत्तर हितका लागि एमसीसी, बिआरआईजस्ता योजना सहर्ष स्वीकार गर्नुपर्ने बताए ।
सोअवसरमा नेपाल आदिवासी जनजाति पत्रकार महासंघ झापाकी अध्यक्ष भूमिका सुब्बा, नारी संचारगृह झापाकी अध्यक्ष रेजिना गौतम, सामाजवादी प्रेस संगठन झाका अध्यक्ष शम्भुजित दाहाल, प्रेस चौतारी नेपाल झापाका उपाध्यक्ष प्रदिप परियार, प्रेस युनियनका राजेन्द्र गौतम, पूर्व पुरस्कृत व्यक्तित्वहरुको तर्फबाट अग्रज पत्रकार लिला बराल, पत्रकार महासंघ झापाका अध्यक्ष एकराज गिरीले डी. कौडिन्यको योगदानको मुक्तकण्ठले प्रशंसा गरेका थिए ।
त्यस्तै नेपाल कम्युनिस्ट पार्टीका सुमन सिंह सी, नेपाल पत्रकार महासंघ कोशी प्रदेश महासचिव विवेक गौतम, डी कौडिन्य पुत्री तृप्ति आचार्यलगायतले डी. कौडिन्यको योगदान अमर रहेको भन्दै उनको वौदिकताको चर्चा गरेका थिए ।
प्रेस सेन्टर झापाका अध्यक्ष राजु पाठकको अध्यक्षतामा सप्पन्न कार्यक्रममा उपाध्यक्ष होमप्रकाश अधिकारीले स्वागत र सचिव पुष्प खड्काले संचालन गरेका थिए ।
कार्यक्रममा स्व.आचार्यसँगै सहिदहरु खगेन्द्र दंगाल, शंखर घिमिरेको समेत चर्चा गरिएको थियो ।
-1730172087.jpg)
