इटाभट्टा । झापाको धुलाबारीमा कालजयी गीतहरु गुञ्जने भएका छन् ।
मेचीनगर-९, स्थित सातपाखे रिसोर्टमा बुधबार आयोजना हुने सांगीतिक साँझमा ख्याति प्राप्त कलाकारदेखि नव प्रतिभाहरुले आफ्नो प्रस्तुति दिनेछन् ।
कला, संगित एवम् साहित्यमा रुचि राख्ने व्यक्तिलाई जोड्दै गीत-संगितलाई प्रवर्द्धन गर्ने उद्देश्यले सांगीतिक साँझको आयोजना गरिएको सातपाखे ब्याण्डका राजेश पराजुलीले बताए ।
कार्यक्रममा पुराना कालजयी गीतहरु नयाँ कलाकारहरुले प्रस्तुत गर्नेछन् ।
जसमा राष्ट्रिय कलाकारहरु कमल रसाइली, उत्तमजंग लिम्बुलगायतका कलाकरहरुले साथ दिनेछन् ।
सो अवसरमा वरिष्ठ संगितकार भरत लामा, अग्रज संगितकर्मी शिवशंकर थापाबाट सांगितिक अनुभव र अनुभुति साटासाट हुने आयोजकले बताएको छ ।
सांगीतिक प्रस्तुतिसँगै देही आर्टका कलाकरहरुले लक्ष्मीप्रसाद देवकोटाको लेखन, गोपाल योन्जनको संगित संयोजन र स्वर सम्राट नारायण गोपालको गायकीलाई चित्रमार्फत झल्काउने प्रयास रहने कलाकार क्षितेन शेर्पाले बताए ।
समारोहमा कालाजयी गीतहरुको लाइभ प्रस्तुति रहने छ ।
संगित र कलामा रुचि राख्ने सबैलाई सहभागी बन्न आयोजकले आग्रह गरेको छ ।
सांगीतिक साँझलाई सातपाखे ब्याण्डले संयोजन गरेको छ भने देही आर्ट, मेचीनगर नगरपालिकाले सह-आयोजना गरेका छन् ।
कार्यक्रमलाई ल्होत्से इङ्लिस स्कुल, छहारी रेस्ट्रो र माँ पाथीभरा स्वीट्सले सहयोग गरेका छन् ।
लामो समयपछि आयोजना गरिएको फरक किसिमको सांगीतिक साँझले संगितकर्मीहरुलाई जोड्ने अभिप्राय आयोजकले राखेको छ ।
मंगलबार प्रेस क्लब मेचीनगरको कार्यालयमा पत्रकार सम्मेलनको आयोजना गरी आयोजकले कार्यक्रमबारे जानकारी गराएको हो ।
सो अवसरमा आयोजकको तर्फबाट राजेश पराजुली, देही आर्टका निर्देशक क्षितेन शेर्पा, युवा व्यवसायी धनराज थापा, गायक कमल रसाइलीलगायत उपस्थित थिए । कार्यक्रमको संयोजन मन्जिल देवानले गरेका थिए ।
-1730172087.jpg)
