मेचीनगर । कविशिरोमणी मावि मेचीनगर-९, खुट्टिडाँगीको प्रधानाध्यापकमा दामोदर ढुङ्गेल नियुक्त भएका छन् ।
बुधबार बसेको विद्यालय व्यवस्थापन समितिको वैठकले ढुङ्गेललाई प्रअमा नियुक्त गरेको हो ।
विद्यालयका निवर्तमान प्रअ कृष्णप्रसाद अधिकारी केही दिनअघि सेवानिवृत्त भएसँगै प्रअ पद रिक्त रहेको थियो ।
व्यवस्थापन समिति अध्यक्ष संगिता थापा, शिक्षक अभिभावक संघ अध्यक्ष चुडामणी रेग्मी, पूर्व व्यवस्थापन समिति अध्यक्ष चन्द्रमणी पौडेललगायतले ढुङ्गेललाई नियुक्ति पत्र प्रदान गर्दै बधाई ज्ञापन गरेका थिए ।
२०६२ सालबाट संस्थागत विद्यालयबाट शिक्षण सेवा प्रवेश गरेका ढुङ्गेल २०६९ सालबाट सरकारी सेवा सुरु गरेका थिए ।
महेन्द्ररत्न मावि बिर्तामोडबाट मावि नेपाली राहत शिक्षकको रुपमा सरकारी अस्थायी सेवा सुरु गरेका ढुङ्गेल २०७१ सालमा स्थायी सेवा प्रवेश गरेका थिए ।
पशुपति मावि राजगढ, बुद्ध आदर्श मावि बुधबारेहुँदै २०७२ मा कविशिरोमणी मावि खुट्टिडाँगी आईपुगेका ढुङ्गेल २०७३ सालबाट विद्यालयको सहायक प्रअको रुपमा कार्यरत थिए ।
चुनौतीकै बीच अवसर पनि रहने भन्दै नवनियुक्त प्रअ ढुङ्गेलले शिक्षक, कर्मचारीको संयुक्त टिमले विश्वास गुमाउँदै गएका गाउँका सामुदायिक विद्यालयको विश्वास फर्काउन संभव रहेको प्रतिक्रिया दिए ।
साथै समितिले विद्यालयको सहायक प्रअमा शिक्षक तुलसा दंगाललाई नियुक्त गरेको छ । दंगाल साबिक उच्च मावि दरवन्दीमा कार्यरत छिन् ।
सेवा निवृत्त प्रअ अधिकारीको अवकाशसँगै विद्यालयमा मावि अंग्रेजी विषयको दरवन्दीमा भने पदपूर्ति हुन बाँँकीनै रहेको छ ।
