काँकरभिट्टा । यतिखेर मेचीनगर गोल्डकपको पाँचौ संस्करण चलिरहेको छ । काँकरभिट्टा माविको खेल मैदानमा सञ्चालित गोल्डकपमा राष्ट्रिय खेलाडीदेखि विदेशी खेलाडीसम्मको व्यापक सहभागिता छ । तर, एक स्वास्थ्यकर्मी जो प्रतियोगिताको आकर्षकणको केन्द्र बनेका छन् ।
जब उनी मैदान प्रवेश गर्छन् सयौँ दर्शकले ताली बजाएर उनको हुटिङ गर्छन् । उनी हुन् मेचीनगर नगरपालिका वडा नम्बर २ का स्वास्थ्यकर्मी हरि देवकोटा । काँकरभिट्टा फुटबल ट्रेनिङ सेन्टरले मेडिकल डेक्सका लागि हरि देवकोटालगायतको टोलीलाई परिचालन गरेको छ ।
जब मैदानमा खेलाडी घाइते हुन्छन्, उनी मेडिकल किड्ससहित मैदान प्रवेश गर्दा दर्शकले अपार समर्थन गरेका हुन्छन् । मैदानमा गुन्जन्छ उही आवाज, हरी दाई! हरी दाई!! नारा । यसको कारण होचो कद र मोटो शरीर भएरै पनि फूर्तिका साथ उनको मैदान प्रवेश गराई । उनको त्यो फुर्तिलो जोस नै दर्शकको समर्थन हुनुपर्छ ।
यसो त उनी यो मैदानमा मात्र होइन हरेक खेलकुद प्रतियोगितामा सहभागी हुन चाँहान्छन् । नगरले पनि उनलाई खटाउँछ । सिनियर अहेवमा कार्यरत उनी मेचीनगरका लोकप्रिय स्वास्थ्यकर्मीमा पर्दछन् ।
त्यसमा पनि मैदानमा उनले दिने छरितो स्वास्थ्य सेवा उनको अर्को विशेेेषता हो ।
खेलाडीलाई कुन स्वास्थ्य सेवा चाहिएको हो त्यो उनले बुझ्छन् र सोही अनुसार तत्काल निर्णय गर्छन् । त्यसैकारण खेलाडी पनि उनीसँग सन्तुष्ट हुन्छन् ।
उनी खेलप्रेमी मात्र नभएर पूर्व स्थानीय खेलाडीसमेत हुन् ।
हालै नकलबन्दामा सम्पन्न प्रतियोगितामा समेत उनै देवकोटा स्वास्थ्यकर्मीका रुपमा सहभागी थिए । उक्त मैदानमा पनि उनले दर्शकको यस्तै समर्थन पाएका थिए ।
मेचीनगर-५, निवासी देवकोटा मेचीनगर नगरपालिकाको स्वास्थ्य कार्यालय अन्तर्गतका कर्मचारी हुन् । दिउँसोको समय वडा स्वास्थ्य कार्यालयमा व्यस्त रहने उनी बिहान बेलुका सामाजिक कार्यमा व्यस्त हुन्छन् । यसो त गाउँघरमा समेत उनी सबैका प्रिय हरि दाई हुन् ।
