झापा । नेपाल शिक्षक महासङ्घले घोषणा गरेको दोस्रो चरणको आन्दोलन हाल जारी छ ।
राजनीतिक दलका केन्द्रीय पार्टी कार्यालय घेराउ गरी शिक्षकहरु अहिले रिले अनशनमा छन् ।
सो पश्चात महासङ्घले चैत २० गतेबाट काठमाण्डौं केन्द्रित अनिश्चितकालीन सडक आन्दोलन घोषणा गरेको छ । सोको लागि महासङ्घले देशभरका शिक्षकलाई अनिवार्य काठमाण्डौं आउनसमेत सर्कुलर जारी गरेको छ ।
आन्दोलनलाई सघाउ पु¥याउन चैत १६ गते भित्र जिल्लामा प्राधानाध्यापक भेला सम्पन्न गर्न महासङ्घले अनुरोध गरेको छ ।
बुधबार एक सूचना जारी गर्दै महासङ्घले चैत २० गतेबाट शिक्षा मन्त्रालय तथा स्थानीय तहबाट हुने गोष्ठी, सेमिनार, तालिममा सहभागी नहुन आह्वान गरेको छ । साथै आन्दोलन अवधिभर एसईईलगायत कुनै पनि परीक्षाका उत्तर पुस्तिका परीक्षण नगर्न भनेको छ ।
शिक्षक आन्दोलनलाई साथ दिन अभिभावकका सङ्घसंस्था, विद्यार्थीका सङ्घसङ्गठन तथा विद्यालय व्यवस्थापन समिति महासङ्घलगायतलाई आग्रह गर्नसमेत महासङ्घले सूचनामार्फत शिक्षकहरुलाई आग्रह गरेको छ ।
त्यसैगरी महासङ्घले एक विज्ञप्ति जारी गर्दै शिक्षा मन्त्रीस्तरीय वार्ता टोलीसँग वार्ता नगर्ने जनाएको छ ।
शिक्षा मन्त्रालयले महासङ्घसँग संवाद गर्न मन्त्रीस्तरीय वार्ता टोली बनाएको जानकारी पत्र प्राप्त भएको जनाउँदै शिक्षा समितिमा विधेयकको संशोधन सम्बन्धमा छलफल भइरहेकाले मन्त्रीस्तरमा वार्ता गर्नुको कुनै औचित्य नहुने महासङ्घको भनाई छ ।
हालको सन्दर्भमा छलफलको क्रममा रहेको शिक्षा विधेयकमाथिको छलफल तीव्र बनाउँदै शिक्षा ऐन शीघ्र जारी गराउने पक्षमा समय खर्चन सम्बन्धित सबैमा महासङ्घले आह्वानसमेत गरेको छ ।
